من طرف احمد الجواري الجمعة ديسمبر 05, 2008 3:43 pmياهوالكال طاحت راية العباس
ماصدك خرافه وامشي بحجايه
ايه من الله ايه تكول طاحت ليش
ماطاحت اكلك؟ نزلت الايه
وبس عباس امس فسرهه للعباس
من جاب الفرات وماشرب مايه
بعيونه انرسم خط الشروع حسين
وجفوفه الوسيله وزينب الغايه
وهذاك بكربله هالواكف العباس
ومكابل حسين وشايل الرايه
مرايه ومن وكف كدامهه العباس
موعباس بيهه حسين المرايه
واقره الايه كلهه وارجع اقره انوب
عين وباء والف والسين يعني انته
عباس وعلي وبالحرب ياعباس
كلك تبتسم للموت لوشفته
يالعينك علم والباء بسم الله
يعني الف رمح والغيره شايلته
سينك معجزه ومنهه انكتب تاريخ
تاريخ الوفه العباس معجزته
واكف عالنهر والعطش يشرب بيك
وبايدك فرات ومايه ماضكته
ولهذا السبب سموك راسك حار
وبعين الرجوله من الزلم فلته
يالكلك كرم ومن الكرامه البيك
لجفوفك يجيك الماي لوردته
وبجفوفك امس جبت الفرات وجيت
وبمعنه الوفه المايدري علمته
استسهلت العطش لمن ذكرت حسين
والعزت عليك شوصتك بته
ظل همك ترد وسكينه تشرب ماي
بس شاء القدر بالماي من جبته
يتحول سهم وبعينك يحط ليل
ويبوك الكمر من عين عاشكته
وظل بيك الوفه حته من اجاك الموت
رخصت النفس وبهيبه رافكته
وحسينك بقيت اعله العهد وياه
حد كطع النفس وفاي ماخنته
وصلت للدفن جلبت بالدفان
يدفنكم سوه وبحسين حلفته
كلبك مااطاك لكربله اتعنيت
تركض بالنعش وحسين كابلته
